ბურჯანაძე ანტირუსული რიტორიკისაგან თავშეკავებისაკენ მოუწოდებს

დღეს პარლამენტის თავმჯდომარემ ნინო ბურჯანაძე ბიუროს სხდომაზე მოუწოდა დეპუტატებს თავი შეიკავონ ურთიერთობების გამწვავებისაგან რუსეთისა და საქართველოს პრეზიდენტების შეხვედრის წინ, რომელიც 13 ივნისს სანკტ-პეტერბურგში გაიმართება.

მისი თქმით, ამ ეტაპზე საქართველოს პარლამენტი თავს შეიკავებს რუს სამშვიდობოებთან დაკავშირებით რაიმე სახის გადაწყვეტილების მიღებისაგან.

“ამ ეტაპზე ჩვენ შემოვიფარგლოთ მხოლოდ [აფხაზეთის] სამშვიდობო გეგმის მოსმენით იმიტომ, რომ ბუნებრივია, თუ ჩვენ სამშვიდობოებთან დაკავშირებით დავიწყებთ საუბარს, შეფასებები იქნება საკმაოდ მწვავე და არანაირი სურვილი არ მაქვს შეხვედრამდე რამდენიმე დღით ადრე იყოს პოლემიკა რუსულ-ქართულ ურთიერთობებზე საქართველოს პარლამენტში“, – განაცხადა 5 ივნისს ბურჯანაძემ.

მისი თქმით, მაღალი დონის შეხვედრა იძლევა შესაძლებლობას რუსეთ-საქართველოს ურთიერთობებში, რომელიც დღეს “ჩიხში“ იმყოფება, გამოსავალი იქნას ნაპოვნი.  

“ყველაზე მნიშვნელოვანია, რომ კონკრეტული შედეგებით დასრულდეს აღნიშნული შეხვედრა“, – დასძინა პარლამენტის თავმჯდომარემ.

This post is also available in: English Русский